حال الناس ....

الناس باتت تبحث عن زوايا رومنسيه ومواقف مضحكة في حياتها وتتجاهل ظروقها ومعاناتها وعجلة الروتين القاتلة واللي ممكن تقودك للملل والرتابة وقد توصلنا لشي من الكآبة اذا استمر الروتين بذات الحال ولا تجديد ولا لمسات جانبيه تعيد للنفس قوتها وبهجتها . هل ترغب في تجديد دقات قلبها للاسرع .. وهذا اول علامات الحب واقواها .
اذن انت لازم تحب وتنحب ... من مواقف الحياة والبحث عن حب وشعور متجدد يعيد نظرتنا لجمال الدنيا اخترت هذا الموقف الاجتماعي الطريف للبحث عن الحب والاهتمام بطريقة مباحة

الموضوع تحكيه لى زميلتي

.. كلنا يعرف ايام الخطوبه واش معروف عنها من رومنسيه وهي العالم الثاني للشباب والبنات قبل الزواج .

تقول صاحبتي تقدم لي عريس عند عمي اخو ابو لان ابوها متوفي .. نشدنا عن الرجال ولقينا علومه زينه والسب اكثر من المدح لكن النصيب غلاب .. وبعد ماتبي تزوج من اقاربها ..

عمها ( ولي أمرها ) قال بالنظره الشرعيه وتقابلوا وطارت عيونهم بالجدار ثم صكت في بعض وتم النصيب .
قال العريس المثقف ،، يا خال متى نملك ترى جاهز من مجاميعه .. بس ابي املك لعلنا نتفاهم ونتخاطب ونزيد سمننا عسل ..

الملكه قبل العرس بليله ..

وصارت المشكله وكثر الحتسي وزعلت خويتي من عمها وقالت موهو عمي ولا يحبنا نعلبوس خليه ينتظر واثقلي يا خبله:( .. قالت معصي غير تملك .. ارسلوا خالها بالدف والدخايل والحشيمه على عمها كود انه يقنعه والحمدلله وافق عمها وحدد موعد الملكه ..

العريس طار من الفرحه واخويتي غايبة اسبوع قبل الملكه تقول بشرتها تخرب من مقابلنا الموووووهم .. داومت يوم السبت والملكه يوم الربوع .. وش الكشخه وش الزين ماهي خويتنا ذيك قلت الملتسه تسوي كل ذا قالت والله اكثر من تسذا ؟؟؟

خوينا العريس ماطول بالغياب راس الأسبوع جاب جوال وطقه بالكرتون ومغلفه وحاطن عليه قلبين وكاتب تراها قليله بس اقبلوها والجايات أكثر .. ويتصل بعمها ويقول له ابي اشوف الأهل !!
عمها .. من هلك ؟؟
العريس : ياخال ودي اشوف المدام اقصد بنتكم وعندي غريضات لازم اسلمها لهم .
عمها :: اي غريضات ؟ ابي اسبقك لمهم وانت لاتوطوط عند البيت ما علمتني .
العريس : ابشر ودي اروح لهم اليوم المغرب.
عمها : خير خير ..
العريس طق الكشخه وتبخر وتعطر من عشرين عطر شيء زين وشيء خايس وطق سلف السياره وصل على الموعد حتى صلاة المغرب نوى يقضيها اذا رجع من موعد الحب . طق الباب وطلع له عمها قلطوا ...... تقهووا ... شربوا الشاهي ... ماله نفس العريس يشرب شي بس قاعد يجامل عم الخطيبه ..
عمها : وين الغرض اللي تقول عليه .
العريس : معي بعطيهم .
عمها : هات وشو ؟؟
استلم الغرض وشاف الجوال وقال للعريس والله اعذرنا هديتك موفره ولا تحتاجون الامور ذي زهب نفسك ونتمم العرس واقعد معها سولف فيس توفيس بدون جوال ..
العريس : ياخال .. ياعم .. يا .. يا
عمها : تراني مشغول وابي اشوف وش وراي ولا صرت زاهب حياك الله ..

صاحبتي رومنسيه الله يوفقها ويتمم فرحتها والشباب اليوم يعشقون الرومنسيه ويتغلغلون باعماقها ... اسأل الله لهم التوفيق جميع ...