مذكرات معلمة 3

الليلة اللي مضت كانت ثقيل وغريبة هوشات ونزاعات بين
الأشقاء وبعد فض الاشتباكات الأسرية وتهدئة الوضع العام وقد الليل ليّل والعالم اسكنوا
الا بيتنا هواش على مدار الساعة تقل طالبان بالبيت الموهم
فيني رعبه من الظلام والهدؤء بتالي الليل ما عرفت لها سبب إلى يومكم هذا مع أننا عائلة تطمح
للعيش في هدوء وسلام لكن تجري الرياح بما لا تشتهي السفن ..
بالعادة لما يحل وقت النوم أجهز حالي للنوم وما أنسى اترك اللمبة اللي بالممر
ضاويه لكن ذيك الليلة قوة التركيز منعدمة والأفكار متشعبكه ببعض
ولا جاى ببالي انتبه للمبة المشؤمة تمددت وقبل ما أنام عديت كم رأس من الغنم
وسبحت وقلبت يمين وقلبت شمال ويالله يالله نمت خخخخخخخ
ما بغيت أنام والله مزعوجة على الأخر ..
وبعز النوم وتوه ماحلي إلا هذا أذان الفجر بمسامعي
الله أكبر ... الله أكبر ...
واني أحس بذاك الشيء يجلس على راسي يقول وراك عجله توه يأذن
استريحي ما تحسين عظامك تو ما تواست بالفراش ..
واني أغلق على حالي بالحاف وأغطي راسي قلت وأنت صادق والفجر توه يقووم
بستريح شوي وبصلي بصلي من غير الله ما يعووق بشر ..
وان تجيني الفكرة عقب تقول لي افااااا بتر قدين والأذان بمسامعك ماهقيتها منك
وش تقولين لربك يوم ينشدك عن صلاتك بتقولين بديت الين إعظامي
يا جعل إعظامك حطب السعير قومي خافي ربك وصلي
قلت أي والله صدقتي وان تجيني الرعبه وكأن احد يقول لي شوفي الممر اللي
قدام غرفتس مظلم الظاهر فيه حرامي وألا احد غريب جاء وطفئ اللمبة
ولو بتطلعيين من غرفتس بيقضب ارقبتس ويمصعها
واني ارجع أتغطى بالحاف وأقول بنفسي والفجر طيب ما أصلي ؟؟
لالا تصلين إذا طلع اضو تقدرين تقومين وتجهزين للدوام وبالمرة تصلين
ما بتطير الدنيا ترى أنتي محبكتها بزود ارقدي الله يهديس ..والمرة ذي تراخيت بفراشي وتواسيت ناوية إني أغلق النقاش بالموضوع
واخترع الحل المريح نفسيا راحت نومه وما صليت الفجر بوقته
لكن إن شاء الله إن الله معي كأني من شالني وقعد بي واني
أفز وأتجاسر والعن إبليس عني وادعس لباب غرفتي وافتح الباب
واسمي بالرحمن من الظلمة اللي توحش وأقول بخاطري
أيهم أوحش ظلمة الممر وإلا ظلمة القبر يالمسفوهة الصلاة لا تفوتك مادمتي قادرة
والحمد لله تطهرت وصليت وجلست على سجادتي شوي تحمدت ربي
أني لحقت فرضي وصليت وقمت بعدها رجعت لفراشي بعد توه عن وقت الدوام
ونعلبوا أبو إبليسي ما عاد قربني قلت تعال رقدني الحين هذا وقتك لكن
المغضوب قال معصي !!

هذي لحظات مرت بي قبل صلاة الفجر ليلة البارحة وطبعا يمر عليكم
مثلها أكيد ويمكن أزود ناقشوا معانا المواضيع اللي تلهيكم عن الصلاة واش الحلول
بتصوركم لهذي المشكلة ؟
وبعد فيه السوالف اللي تطري بالصلاة والركعات اللي تفوت والركعة اللي بدالها
سجده والفاتحة اللي بالسجود والعكس تسبيح بالرفع والله المستعان عزانا
بديينا وفرووضنا كبير والله يصلح الحال للجميع .