البارح وانا بالمنتدى اتصفح والا هذي رساله من بابا فرحان تطق الشاشه تقول ما ودك نطلع نغير جو ونتمشى شوي ترى الجو بالرياض الليله برااد والهوى شرقي ..
عاد متملله مثلكم وطفشانه والرساله جت بوقتها والمواصل قريب .. قلت له فين نتقابل قال باالمجلس ولاتعلمين احد انك تبتجين ..
ماكذبت خبر تسنعت ونسعت القذله وتعدلت ولبست عباتي وقلت للسواق خذني على بيروت السعوديه ( شارع التحلية بالرياض) وصلت ودخلت طلبت واحد كبتشينو وانتظرت الرجال طبعا يتغلى لطعني نصصصصصصصصصصصصصصصصصصصصصص ساعه الين شرف وانا يوم شفته قلت
هلابك وش له تأخرت قال مريت صرافي ( يبي يعلمني انه مقرش )
قلت .. له وش تشرب بص
قال ... انا اللي بقهويك ..
قلت ... الضيافه على الكبير منا .. وحلفت مايحاسب غير أنا >>>> حسيته انبسط اني بحاسب عنه وقام يتشرط هات لقيمات وابي تشيز كيك وين الكبتشينو
وشوي الا اهديك عمري واقفن على روسنا قال بابا فرحان انا ماقلت لك لاتعلمين احد انا هنا ..
قلت .. ماعلمت احد .
قال اهديك عمري وصوته الخشن كأنه توه قايمن من النوم : اسمعوا انا ماقلت لاواحدن منكم يهايط في مواضيعه واكتبوا وخلوا عنكم الدجة .. هذا وانتم المشرفين اجل وش خليتوا للاعضاء وش بقي انت وياه ماسويتوه بالمنتدى عافسين ابو الدنيا .. رجاء بينكم مشاكل شخصية حلوها خارج المنتدى في قلعة وادرين وخلوكم على الهقوه وترى مااقبل اي خطاء يصدر بعد التنبيه هذا
..انا مارفعت راسي وطول الوقت وانا خشتي بالارض ويومه يخلص الهوشه .
قلت : ابشر
قال بابا فرحان :ترى والله ملينا خلنا نتسلى وندخل جو المخانق والهوشات ونحرك المنتدى ونستانس شوي وابشر مايصير خاطرك الا طيب .
اهديك عمري : خير خير ان شاء الله بص لا تمسخونها والا ترى بالشلوت انت وهي ..
تركنا اهديك ومشى وهو يهرج مع نفسه ويتحلطم علينا
,,قلت : شفت يا بابا خليتنا نتهزء من ورى اللعب والهياط اللي تسويه بالمنتدى .
خلني احذف المواضيع اللي نزلتها ويادار مادخلك شر .
قال بابا : انا مااسمح لك تحذفين اي موضوع وان حصل والله لاكتب بكل منتدى تشهير فيك واني لاهاجمك واكرهك بعيشتك الين تعقلين اتركي المواضيع وتأسفي مني قدام الاعضاء
ويحضر الصلح ثلاثه مايزيد فرد ولاينقص فرد وبعدها افكر بالموضوع ومايصير الا خير
قلت : بس هذا مطلبك انت تامر يابابا واحنا نطامر مالك الا من نزل الصلح وبجيب محرم لي وانت اختار الاثنين الباقين .
قال بابا : لا أنتي اختارهم كلهم الثلاثه لحالك .
قلت : ابي الناي واهديك عمري وسعودي عسل .
قال بابا : خلاص طيب متى تنزلين الموضوع .
قلت : كم الساعه معك .
قال بابا : بعتمة الليل .
قلت : تاخر الوقت لكن اذا مو الليلة تلقاه بكره .
قال بابا فرحان : كم عمرك ؟ .
قلت : انا من مواليد 1396وعمري 37 سنه
قال بابا : كيف انتي اذا مواليد 96 عمرك 34 .
قلت : هذا الموجود بالكارت حق العائله بس انا اكبر من العمر هذا .
قال بابا فرحان : متزوجة .
قلت له: لو قلت لية هذا السوال والله لاعلمك بالصدق .
قال بابا : ردودك بالمنتدى تدل انك كبيره .
قلت له : والله بس هذا سبب سؤالك ماتشوف ان السبب كوني جريئة .
قال بابا : لاوالله بس احسك ام والا جده يالعجيز .
قلت له : انا عانس .وبعد تراي ماني ــــــــــ وانا ولد ماني بنت .
سكت شوي ، تراني ماني مصدق يقوله بابا فرحان .. وانا كنت بموت ضحك عليه الافطست ضحك
..قال بابا : اجل ليه تقولين أنك ــــــــــ .
قلت : تقدير ومعزه وتشريف لي أكون مطيريه مثل أهديك عمري .
قال بابا : طيب وش تكونين اذا ماانتي مطيريه .
قلت : انا ،،،،،،،،،،،،،، .
قال بابا : والله مايهمني شمريه والا مطيريه ، طيب وانتي مدرسه
قلت : ايه مدرسة بالمرحلة الثانويه .
قال بابا فرحان : مااصدق انك ولد .
قلت : تدري انك رفعت ضغطي البارح (قبلها بالليله دار نقاش حاد بيننا بالشات ) وانا اليوم ارد لك اللي سويته قبل . وسألته عن ............ !!! ..
طبعا حشينا في الاعضاء كلن بأسمه .. اهديك عمري مبسوط على نكه كله اللوان ، وسعودي عسل ، والناي قلت ماادري من اللي ضاحكن عليها وقايلن لها تعرفين تكتبن ، وأسيره الصمت ، وغرام ، والمجرووح ، آآآهات الصمت
، وعلقنا على الردود وخططنا للمواضيع الجايه ورتبنا المهام وسبينا بعض اللي يقول ياعجيز واللي يقول ياشين .. هذا غير عن اتصال بابا فرحان اللي يقطع كل شوي ... الموووووووهم
والله انبسطنا ساعه ونص ضحك وتالي الليل بغى يجيب الربابه بابا فرحان لكننا تعذرنا مجلسه
وختمنا العلوم بالاتفاق على الصلح وهذا صلح بيني وبين بابافرحان واللي فات مات واحنا اولاد النهار ده .
ساعه ونص يابابا فرحان مرت كانها دقيقه . والله ياهي وناسه وقعدتك ماتمل
ليست هناك تعليقات:
إرسال تعليق