.
.
دائما ماتصر مجادلة حول مصاريف البنات والاولاد ومن اكثر ومن اقل .. بالنسبه لي انا اشوف اننا متعادلين في
الاحتياجات والصرف بعشوائيه او تدبير وقليل من يرتب اولولياته في المصروف ..لكن الشباب يتهمون البنات
بكثرة المصاريف على شيء يسوى وشيء مايسوى الا ان البنت ممكن تلاقي في نهاية الشهر عندها فائض
والبعض تكون قدرة تعدي الشهر بدون سلف لكن الشباب المصاريف والعجز هي سمات بارزة في ميزانياتهم سواء كانوا طلاب جامعه يعني دخلهم ما يزيد عن مكافئة او موظفين لهم رواتب شهريه منتظمة ... ولله الحمد الشباب طول الشهر مطفر والجيب خالي ..
وسلفيني يُمه وسلفيني يا هند والا اذا مااحد عطاه وجه طب في اضعف اخوياه ولطش من جيبه المقسوم بمسمى
انه خويه ، مع العلم ان خويه موب احسن منه حال لكن شيء افضل من لاشيء ...
نستعرض مصاريف الشباب .. او وين بالضبط تروح المكافئة او الراتب ...
السيارة ...
لقاء سريع مع احد الشباب ..
وش نوع سيارتك مرسيدس أم أودي؟!
هذا السؤال وجهته لأحد الشباب..
لكنه فاجئني يقول «لا يا أختي هذه نيسان «مكسيما» موديل 2002 لكنني صرفت عليها دم قلبي حتى تصير كذا»!
هذولا شباب القز بالشوارع والاستعراض عند مدارس البنات ... يحب يزين السيارات بالاكسسوارات والاضاءات والالوان والحقيقة انهم اصحاب خيال واسع وتتحول السيارة بشوية لمسات من هيونداي «اكسل» موديل 98» الى مرسيددس او أودي .. لكن مصاريف ممكن تصل لسبعة الاف مافيها شك !!!!
الملبس ...
الشباب اليوم ماعاد لبسه ثوب وشماغ ونص ساعة واقف على المرآية يشوف المرزام الضايع ... تغيرت الاحوال وصارت قمصان الماركات والبناطيل الجنز والشورت والكاب والشوز اكرمكم وساعة عبدالله بالخير الحمراء احد مميزات الشباب اللي لابد تأخذ حقها من الدخل .
. ..
القطات ولزوم الجمعات والسهر والفله ..
هنا فيه شباب يطق الصدر ويحرم من ظهر المره اللي بعد مااعرس عليها ان مايعشي الشلة غيره ويطفر بعدها بيوم ويلعن ابو ساعة عشاهم فيها هذا بالاضافة لـمصاريف الفلة .. ( جراك ، وفحم ، معسل ، شاهي ، بلوت ، مشروبات بارده ، فصفص دخان ، مويه ) وهذا حسب نوع الشلة ..
السفرات ..
يومين بجده ويومين بالخبر هذا للطفارى والغلابه رغم ان الجيب خالي الا انه يشجع على السياحة الداخليه في ربوع المملكه متى ما طاحت براسه ولقي مثله طفارى يقطون بالسفرة بشرط يناموا عند البحر بحجة النفاه وسعة الصدر بنومة عند البحر .. وهذا حال طلاب الجامعات اصحاب الدخل المتقطع كلنا نعرف المكافئات اللي تنزل كل اربع شهور مره اما بالنسبة لموظين الحكومة تلاقيه ابن عز اول الشهر ومن عشرة الشهر يتسلف بسخاء لانه عارف نهاية الشهر راتبه يرد السلف ويغطي مصاريف عشرة ايام جايه من الشهر الجديد .
الجوال وفواتيره ..العطر ..الحلاقة الدوريه ... البنزين ... قلم رسمي ينفع ينحط بالجيب لو فيه مناسبة رسميه .. كبك ذهبي ... جزمة كعب اكرمكم الله لزوم الرزه .. المراجع والكتب ...
برأي اصبحنا متقاربين في المصروفات ... لكن أي شاب تجد ميزانيه في نهاية الشهر عاجز ومديون والبنت
رغم اننا نقول بكثرة مصاريفها الا انها تصل نهاية الشهر بسلام وبدون عجز في ميزانيتها ..
ليست هناك تعليقات:
إرسال تعليق