قيس ابن عمي عندنا .. يا مرحبا .. يامرحبا ..

---

قيس الابن الاكبر لعمي الاكبر.. وعمي ابو قيس هو ابن لاحدى زوجات جدي الأوائل واللاتي كن

 دميمات الخلقه ولكن القلب ومايريد و ( العشق بلوه ) زمان العشق يعمل هوايل يعني لو حبيبتك قرده مصوره برضو تحبها واليوم اذا مو حلوه ولا حد يطل بوجهها . 

قيس ابن عمي يشبه جدته لابوه مع بعض الفروق البسيطه .. كان قيس مشغل ابو اللي خلفني بالعرس .. ( ياخي مابغاك .. ماحبكش .. ما بيننا تناغم فكري ولا توارد افكار .. وربي ما احس تجاهك يا فلزة كبد امك باي شعور ممكن ينقال عنه اني مرتاحه او اقبل احط راسي على مخده وحده انا وانته ) سيبني اشوف حالي وانته الله يوفقك بالي تسعدك .. 

بس ماكان يفهم الكلام .. ويوم بعد يوم يفرض سيطرته وتدخلاته ومن مااذكر له انه في يوم جاء وبيده رساله وخيزرانه يقول انه لقي الرسالة بعداد الكهربه كاتبها لي شيبوب ولد جيراننا وطبعا الخيزرانه لزوم تأديبي والتحقيق معي من متى اعرف شيبوب هههههههههههههههه ( يخرب بيتك انته وشيبوب والله مادريت عنك ولاعنه ) .. وجلس يهددني انه يوري الرسالة ابويه واخوي الكبير وامي تقوله اقصر الشر يا قيس وانا اعرف هند لسى ماتفهم بهالسوالف وما يفتح لها هالسير الا انت .. فكنا من شرك الله يأخذك ويريحنا منك .. مرات كنت انضرب قبل تلحق على امي وتخلصني من هالمجنون ومرات اتوزى في امي وتفك بيننا ( يازينها ذيك الايام جميله ) 

لما وصل قيس للعسكريه واشتغل واشتغل وعلق رتبة عريف فكر بالعرس وصار يمر علينا البيت يتقهوى عندنا ويجيب لنا خبز حار من المخبز تازه ومره خرب التليفزيون حقنا وشرى لي تليفزيون صغير بالغرفه اتفرج عليه وقال لامي هذا لـ هند .. ومره قال لابوي تليفونكم هذا يشوش كل مادقيت عليكم ما ينسمع الصوت وانا شريت لكم تيلفون جديد ايام التيلفونات اللي طلعت من شركة الاتصالات 

اللي جابو لنا كان لونه احمر ( الحب ومايسوي ) وكان يمدح في الجهاز ومميزاته قال له الوالد ماقصرت ياقيس وانت لا تقعد تكب رواتبك علينا شوف ابوك ايش يحتاج وامك واحنا ماعلينا قصور وان احتجناك ماتقصر .. 

قيس ماكان يفهم ( بس حلو الشعبطه اللي كان متشبعطها ) بعد سنتين من ترقية لرتبة عريف كان قيس مرتب الامور وجاهز من كلو وقال لامه يمه ترى خلاص انا نويت .. والبنت هذي لي يعني لي واخاف ان تأخرت تروح مني وانا مااظمن زوجة عمي تكون حاطه عينها على احد غيري والا بنتها شايفه لها شوفه ( يقصد أمي الله يرحمها ويقصدني ) المهم بدأت الهجوم يزيد من قيس ومره كنت مع اخته ببيتهم فقال من وراء الباب علميها مكان الصحون والقدور زين عشان لاجت ما تقعد تدور ( كنت اموت ضحك على كلامه وعصبيته واصراره كان يعجبني بس والله موش عوزاه زي اخويه ) كيف يفكر يتزوج وحده تعتبره زي اخوها !! 

الموضوع دار بليل بين الوالد والوالده واخويه الكبير ورتبوا انفسهم على انهم يكلموني في قيس اليوم التالي ليلتها اخذت التيلفون الاحمر ودقيت على بيت عمي وكلمة زوجة امي اللي هيه ام قيس وقلت لها تكفين الله يوقفك انا ماشوف قيس الا زي واحد من اخواني وماراح اقدر اعيش معاه على انه زوج .. تكفين ياام قيس ابوي لو سمع رفضي ممكن تنقلب الهرجه معابط وانا مابغى ادخل مع ابوي واخوي اللي متحمسين لقيس في مشاكل وولدك اخو وعزيز وعلى راسي بس عرس وزواج لا .. قالت لي والله هذا عمك وقيس وابوك واخوانك والا انا مالي دخل لكن مادامك ماتبغينه علميني من تبغين .. قلت والله مابغى احد ولا براسي غير ادرس وبس .. قالت خلاص قفلي الخط الحين ومايصير الا خير .. 

يالبى عمتي ام قيس .. ماادري ايش سوت الى يومكم مع قيس ومع ابو قيس حتى تصرفهم عن رغبتهم في لم الشمل واليوم التالي مااحد كلمني ولا فتح لي سيره وبعد سنه اعرس قيس على بنت من اجمل الجميلات واصغر سننا مني واليوم عنده سبعه ابناء مابين اولاد وبنات وكل مره يزور فيها الرياض لازم يمر الوالد واليوم ابشركم قيس ابن عمي كان عندنا .. وطرت عليه الذكرى وحبيت احكيها لكم .. وطبعا اكرمنا قيس وتضيف عندنا اكرم ضيافه وغادرنا بكل حفاوة وتكريم .. بالسلامه ياقيس .. 

كنت اتمنى احكي هالقصة لابنائي وبناتي لكن الله مااراد .. اليوم نحكيها لكم بكواليس عوضا عنهم .. 

زواج ابنة العم من ابن عمها كان امر منتهي ولا خيارات فيه .. تناسبوا بعض ماتناسبوا بعض انحرقي انتي وهوه .. تتزوجوا بعض يعني تتزوجوا بعض .. 

احيانا ابن العم يكون مايبغى ابنة عمه في ببالو وحده من برى العيله .. بس مايقدر يفتح فمو ولا حتى امه تقدر تنقذ ابنها من الزواجه المنكوبه .. ومشت هالزواجات على كثيرين وتقبلوها فتره وبعدها بحثوا عن مطلبهم بزوجة تانيه .. وتركوا بنت العم للهم والغم ..