الثلاثاء، 10 يوليو 2012


مات نايف بن عبدالعزيز ..

كان يسكتنا الملل ومالنا ونيس واليوم يسكتنا الحزن وفجعة الموت اللي اخذت منا العظماء قبل الخسيسين الانجاس ! سبحان الله وش حكمتك يارب يوم تسلبنا فخرنا ومن بيدهم نجاتنا وأمننا وعزنا وتتركنا صفر اليدين لا أمن ولا فخر ولا عزوه !!

تركت بيننا الحراميه والكاذبين والمنافقين ومساويد الوجيه واللي تعلو عليها غبره ترهقها قتره والفجره الكفره تعزهم وتزيدهم وتسعدهم واحنا تنقص عددنا وتضعف شوكتنا وتميت من اصلابنا كل قائد شهم عظيم تهتز له فرائس العدو وتربكه ويقلعه عنا لأبعد مكان ..

متى ننتصر واحنا كلما لنا نقل ونضعف والعدو يفرح ويزيد شره ! من تركت فينا من الصالحين ماعادوا صالحين الهتهم الدنيا وجمع المال والاشداء ماتوا وكنت بهم عليم ايش حكمتك يارب ! اللهم لا اعتراض .. اللهم اننا رضينا بما قسمت لنا .. اللهم لا اعتراض .

مات نايف ابن عبدالعزيز آل سعود وامنت عظامه وسكنت روحه في بطن مكه المكرمه ارض آمنه مقدسة يسكن ثراها امير الامن .. امنت روعاتك وطابت الخاتمه يابو سعود من ارض الله الطاهره في الدنيا الى ملك لا يزول في جنة الخلد بإذن الله ..

مرقدك امان لك اليوم ومراقدنا في الدنيا بعدك للخوف والقلق .. غاب ليل الراحه وانتهى النوم الهني .. الله يعظم صبرنا في مصيبتنا .. اللهم اجرنا في مصيبتنا و اخلفنا خيرا منها .
يوم وصلني خبر وفاة الامير نايف بن عبد العزيز آل سعود كان الخبر مرسول لي رساله من صديقتي اللي كنت انا وهي نتبادل الرسائل الخبيثه ونضحك وكل منا في دنياه لاهي شوي الا هي ترسل لي ( يا ألله الامير نايف مات )
اول تفكير جا ببالي ( البنت دي مهبوله عليها سوالف اكبر منها دايما تغثني ولا تعرف تتكلم ولا تترك عنها الاستهبال ..) صمت بعد الرساله حتى الانفاس وقفت تركت مكاني ورحت اشوف ايش صاير مافي غير التليفزيون ممكن يكون عليه خبر اقلب بالقنوات فيه صورة الحرم المكي ولا فيه طاري شيء ارجع اقفل الشاشه وادخل مجلس الوالد واجلس عند رجلينه واخذ الريموت واقلب بالقنوات مره تانيه الا الخبر عاجل على العربيه ببالغ الأسى والحزن ينعى خادم الحرمين الشريفين الملك عبدالله بن عبدالعزيز آل سعود أخاه صاحب السمو الملكي الأمير نايف بن عبدالعزيز آل سعود ولي العهد نائب رئيس مجلس الوزراء وزير الداخلية الذي انتقل إلى رحمة الله تعالى هذا اليوم السبت 26/7/1433ه خارج المملكة، وسيصلى عليه - إن شاء الله - بعد صلاة المغرب من يوم الأحد الموافق 27/7/1433ه، في المسجد الحرام بمكة المكرمة"

خبر وفاته ملى اجسادنا قشعريرة الخوف يزمنا زم الفاجعه اقوى مما كنا نتوقع مامات نايف بن عبدالعزيز آل سعود اللي يشاهد على الشاشات وهو يحيي الشعب ولامات من نسمع خطاباته ولانراه الا من وراء حجاب اللي مات شعورنا بالامن اللي كان نايف بن عبدالعزيز يكفله و يحييه فينا ويقويه حتى صرنا نهدد باسمه العدو ونرهبهم بذكره كلما هام من العدو هايم على طواريف امننا ومكاننا مانرد الا نقول ياحليلك ( عندنا نايف بن عبدالعزيز ) بدوي على الشجاعه ضربها ونضحك بأعينهم ونتغامزعلى حظهم الشين اللي موديهم برجلينهم لـ نايف ابن عبدالعزيز آل سعود ، مجالسنا عامره وليلنا طويل وقلوبنا مستريحه وراغدين وآمنين كل السعوديين كل المتعايشين معنا بالبلد آمان وعمار وراحة بال ودنيا مايكدرها عدو ..

الصدمه الاولى .. الفاجعه .. ماعلى لسانك الا لااله الا الله .. متى وكيف .. ماسمعنا عنه مايدل انه يتعالج وليه هذا يموت هذا احنا بحاجته احنا بدونه ضعاف مساكين غلابه ..هذا لو بطش فينا واهلكنا له مليون عذر اميرنا وحامينا ودافع عنا غرابيل الزمان يكفي انا مانعيش الخوف وهو راسه يشم الهواء ويكفي انه مايسلم لهم بالهزيمه ويكفي انه رعب العدو وين ماينذكر يجفل القريب والبعيد هذا بالطاري ومثل مالناس تراه علما بان من عرفوه وتعاملوا معه حكوا عنه اجمل القصص واكثرها رحمه وشهامه ومخافة لله لكن احنا نحكم بالنظره الاولى ونايف بن العزيز ال سعود رحمه الله ما ظهر يوم ضعيف ولا ظهر يوم منكسر عاش قويا ومات بقوته ..

اكتسينا بالسواد وبكينا فراقك وسنبكي وخفنا الزمان اللي جاي بعد عينك وضاع الامن يابو سعود واللي مايعرف ايش يعني يموت نايف بن عبدالعزيز آل سعود اليوم فستخبره الايام اي الرجال فقدنا ..
نايف عبدالعزيز ال سعود ماكنت يوم مت فقيد ال سعود انته فقيد كل السعوديين اللهم اغفر له وارحمه ووسع منازله في الجنات العلى .

ليست هناك تعليقات: