الأدب ... وقلة الأدب .

بعض الاحيان احس ان هذا الجيل الحالي يستاهل ( الضرب) حتى ينصلح حاله ويستحق ما وصلوا له من تكنولوجيا وتقنيات ، واحقد على وزارة التربية والتعليم انها منعت المعلمين من استخدام هذا الحق .

واحيانا احزن عليهم واعتبرهم جيل ( المساكين ) يحتاجون للعاطفة والمواساة لانهم فقيرين في كل شيء فقراء بعلمهم ,, وفقراء بامانيهم , وفقراء بحريتهم ..

بالفعل جيل مهزوم .. ضعيف .. منكسر ..فلا مبنى لاخلاقهم ولا معنى لها يتشبهون بمسوخ الغرب في الامور الهابطه ويسترخون خلف اختراعاتهم المبهره على امل ان الجاي افضل من اللي فات ..

حتى لما نحاول سبر اغوارهم تجد قلة ادبهم اكثر من مستوى ادبهم ولكن الحمدلله قله من تجد منهم لا يعرف الادب ..
ولو اختلفنا في تعريف الادب فانا ارى ان الادب هو انك تستحي من نفسك اولا لان الحياء ما نزع من شيء الا شانه .

وحتى تكونوا على بينه وعدم تعجب من مضمون مواضيعي ومااكتب بالميدان
هو أن اكبر مشكله تواجه اي شخص يكتب عموما بأي مكان انه يعلم مسبقا ان ما يتكلم عنه موجود وواقع لكن من يقرأ لايملك الجرأه على قوله او مايعرف كيف يوصله بطريقه ما خوفا من ان يكون في يوم من الايام متهم بما قال ..

ومن هنا ارتكب جريمه حبر بحق نفسي وأعري هذي النفس نيابة عن الاعضاء والادهى من هذا وامر ان البعض لا تجيدون فهم هذا ولا يتركون مالا يعنيهم ..

احيانا من شدة الردود اقول وراهم يردون كأني خلعت ملابسي امام اعينهم .. علما بأن هذا ماحصل وكتاباتي بجملتها لم تخرج عن حدود الادب .. وان كنتم ترون حسب ما وصلني اني متحرره او كما قيل فكيف وصلتم لهذا الامر . ثن ان البعض حسب مااشوف لايفهمون في الابداع وهذي المواضيع لا تكشف سوى عورتي الابداعيه وانا لم اُوقع بأصلي حتى تعطوا الحق لانفسكم بمثل هذي الردود . والا لان الكاتب بنت خلاص تعطون انفسكم الحق وتستوطون حيطها بالفاظكم .

لعلمكم اعتبر خوضي بمثل هالمواضيع الحساسة مغامره كثير ماتنجح وتنقل الفائده بين قطبي البشريه ( الرجل ، الانثى ) وبنظري تستحق المجازفه وما تقرونه هنا او باي مكان يتطلب منكم الحياء من انفسكم وتفهم الامر قبل الرد والاساءة للناس بدون وجه حق او لمجرد انه يناقش امور تجتهدون عبثا على أن تخفونها ..

فعلى البعض ممن يترك لنفسه حرية الرد ان يتجملوا بالعقل وبالردود الجميله اذا ما كنتوا قادرين على تغييرقبحكم ولا قبح الجيل الذي تنتمون له .