يا هلا مرحبا ...

اللي حابين يشاركونا الحفل يتفضلوا بهدوء وياليت يتركوا المقاعد الامامية للاستاذه .......
والاستاذه ..........
والاستاذه ..........
اما بقية المشرفين بالصف التالي للادارة
والاعضاء مما يلون المشرفين وفي هدوء تام اذا تكرمتوا بالجلوس حتى نبدأ ..

طبعا هذا حفل مدرسي كنت مشاركه فيه ايام كنت ادرس بالثانوي .... تصور متكامل للحفل اتمنى يعجبكم .. في اي حفل لابد من تنظيم ادوار الطالبات واماكن تواجدهن فكان فيه طالبتين واقفين عند باب دخول القاعه في يداتهم مباخر ومرش يرحبوا بالضيوف الكرام ..ويرددون العبارات التالية : حياكم الله .
.. اسفرت وانورت .
( طبعا اختاروا اجمل الطالبات للاستقبال وللضيافة تحس بلحظه انك على متن الخطوط المغربية من زود الجمال والرقه بالبنات الله يحفظهن )

و مدوا زولية حمراء من بوابة المدرسة حتى تصل الى مقاعد الحضور ..
وكان حضور هائل ومهيب الحقيقة لدرجة اننا كنا نشوف ربكة بأوجه المعلمات والادارة
وكيف كان الوفد عالي المستوى ..

اللي حصل اني مشاركة في الانشودة الترحيبية التالية :
يا هلا مرحبا مرحبا بالجميع ..
عدي وبل السقى عدي نبت الربيع
والكرامة لكم والكرم مايضيع
عند قوم تخاوو على دينها

دائما تكمن الخطوره بأي حفل في الفقرات الاولى وهي اللي تنقل لك الجواب من عنوانه ..
ابله ثمره الله يرحمها كانت تطلب منا نرفع اصواتنا بالانشوده وبعد نقولها بطريقة متتاليه تقل عرضة جنوبية ..
عاد قدمت لها اكثر من انشوده مثل انشودة ..

من أين أبدأ يا عيون الشعر يا وطن الـجدود
الله أكبر في قلوب الصيد تقصف كالرعود.

لكنها اصرت على الانشوده المذكوره وانا ماااش ما تنفع مع طبقة صوتي ولا اعرف اجيد هالنوع من النشيد لكنها هي وابلة جواهر كانوا متأكدين اني راح اكون نجمة الحفل لاني املك حنجره ذهبية .. واعرف انزل واطلع مع النوته الموسيقيه تمام بدون نشاز ..

ومن كثر مااقنعوني باني املك صوت غنائي جميل صرت اتخيل حالي لحظة دخولي لخشبة المسرح والدائرة الضوئيه تتبعني وين ماتحركت على المسرح و بعد ماانتهي اسمع عاصفة من التصفيق الحار والهُتافات اللي يرددها جمهوري وهم مبسوطين باني اطلقت صوتي الرنان الشجي على مسامعهم الموسيقية في اجمل خيلاتي اللي كنت اعيشها .. وزي اي بنت تحلم انها تحقق ما تتخيلة !! ولو ان بعض الخيلات ماينفع تحقيقها بذيك الفتره لان الناس متحفظة اكثر من الان ..

طبعا أبرز شخصيات الحفل هن الطالبة اللي تقدم فقرات الحفل وكانت مشاعل الله يذكرها بالخير والقارئة للقران
حصه ماشاء الله كانت تقشر ابداننا اذا بدأت ترتل وتقرأ القران .. يليهن في البروز طبعا الطالبات المخصصات لتقديم نشيد .. اما من يقدمن مشاهد مسرحيه فلا يجدن اهتمام من الحضور بالعاده
لانهن وقت الحفل تخذلهن الجرأة قدام كثرة الضيوف والعالم اللي تشاهدهن وسيناريو المشهد ينعفس والبنات من الرعبه ينسون النص .. ويرقعن في المشهد ويضحكن من بعض وتروح علومه علوم ..

المهم بدأ الحفل بتلاوة القران الكريم تقدمت بقرأتها الطالبة حصة .. و يليه ذكر طائفه من اقوال المصطفى عليه الصلاة والسلام تقدمه لكن الطالبة ساره ..

اما الآن نقدم لكم الطالبة / هند الفايد والمجموعه في انشودة ترحيبية بعنوان (ياهلا مرحبا)
يومها افتكر اني نسيت ان اسمي هند الفايد من هول الصدمه يوم سمعت اسمي بالميكرفون واني راح اطلع للعالم اللي برى وانشد .. ابلة ثمره يالله ياهند زي ما وصيتك .. !!!
( والله هند نسيت كل الوصايا هذا اذا ما ضيعت الانشوده )
طلعت على مسرح المدرسة وانا اتصبب عرقا والمجموعه وراي ( مها ، فاطمة ، نجلاء ، ناديه ، هدباء ) الاخيره هذي قحطانيه مرجوجه تدفني قدامهم وانا ارجع ورى ماابي اوقف بالمقدمه صعب العالم تطالع فيك فيس تو فيس والله ضاعت الشجاعة والجرأة .

وصار صوتي يلج ويتراعد والميكرفون يصفر بصوت عالي وانا شوي ارفع المكبر عند خشمي وشوي انزله تحت ارقبتي ابي انشد هالنشودة وافتك .. طبعا الانشودة الترحيبية لازم تردد كذا مره فاول مره كان ماااش لكن يوم سمعت هبت مجموعة البنات اللي من وراي قلت افا عليك ياهند يطلعن هالدلوخ احسن منك .. واني اطلق المقطع الثاني وانا مبتسمة ابتسامة مخلوطه بالرعبه لكني اجدت وابدعت وانطلقت بصوتي اللي لج باركان الحفل وطيبت خاطر ابلاتي ويوم انهيت الانشودة سمعت اصوات التصفيق الحار بكل مكان وبأخر الحفل تكرمت كــ طالبة مثالية واحدى المشاركات بالحفل الختامي لانشطة المدرسة كان هذا عا410 هـ


طبعا المشاركة بالانشطه المدرسية هي الان من اجمل مااستعيد من ذكرياتي .. ولها طابع خاص بالنفس .. ليت الشباب يعود يوما ..

اخيرا هالانشوده الى يومكم راسخه بذاكرتي وما نسيتها

يا هلا مررحبا مررحبا بالجميع ..
عدي وبل السقى عدي وبل الربيع
والكرامة لكم والكرم مايضيع
عند قوم تخاوو على دينها