نجلاء ... سعيدان وحصه

سعيدان ... نجلاء .. وحصه

ثلاثة اشقاء اكبرهم نجلاء
سعيدان التالي
وحصيص اخر العنقود ..


كل يوم تدور بين الاشقاء الخصوم وتحتد النقاشات ويتراشقون بالوسائد وبقايا الاوراق ومحارم الحمام ( المناشف )

هم في اعمار متقاربه الفارق لا يتعدى السنه والسنتين وتعليمهم متقارب نجلاء باخر سنه بالجامعه قسم اعلام ..

سعيدان بالمستوى الثالث بالكليه لقسم الحاسب الالي

اما حصة اخر سنه بالثانويه بالقسم العلمي وهي تعتبر متاخره بدراستها ومن المفروض تكون بالمستوى الاول بالجامعه لكن الصغير دائما يحق له مالايحق لغيره .
كانت حصه العام الماضي في رحلة استجمام مع والدتها وكانت الام تعطي لبنتها فرصة اتخاذ القرار بدون اهتمام مااذا كان هذا هو الصح ام خطأ ..


طبعا لما يبدأ الاخوة بالنقاش يكون كل واحد مسترخي في مقعده والحديث تتناقله الالسنه بكل هدوء لكن هذا الحال مايدووم سعيدان يفز من مكانه
يقول لنجلاء : اقول اسكتي بس والله ماانتي فاهمه شي .

وحصه تترك اللي بيدها وتجي تاقف على راس اسعيدان وهي تصرخ بوجهه تقول له :
لا انت اللي فاهم واحنا الاغبياء تكفى علمنا يا عبقري زمانك .

ترد نجلاء بالاخير تقول : ماعندكم سالفه انتوا الاثنين وانا غلطانه اني اتكلم مع امثلكم يالبزارين .

يقوم سعيدان يرمي ورقه بيده على حصه يقول مابقي الا انتي يالمعيده تعلميني كيف اتكلم . انا اعلمك واعلم ابوك .

تضحك حصه بااستهزاء تقول عاد انا كنت استجم مو مثلك ماخذ دور ثاني بالأحياء ومانجحت الا بالدف


هذا حال النقاشات اللي تدور بيننا بالعاده وبسرعه ينقلب الحوار الى مشاجره وانتقادات لاذعه وسب وشتم واستهزاء وانتقاص للطرف الاخر .. وهذا كله يولد العدائيه بين المتحاورين
عدا انه يدمر الحوار كاكل .. ولا نخرج بفايده منه بكثر ما نخرج بخدوش نفسيه ممن تحاورنا معهم ..

لكن انا حابه اطرح عليكم طريقه جيده لكسب الحوار ..

* قل لنفسك انا راح ادخل النقاش كنسمه هادئه وليس كاريح عاتيه وهذا يعني الاستعداد او تهيئة النفس للهدوء التام اثناء ادارة كفة النقاش .

* اعلم ان الصوت المرتفع يدمر الحوارات وممكن يقلبها بااسرع مما يمكن الى منازعه باليد وماشابه فحاول ان تتخذ نبرة صوت متزنه هادئه اثناء الحوار وهذا بحد ذاته نجاح ..

* النقاش لابد يكون في القضيه الحاليه ويستبعد اي قضايا قديمه لاننا بذكر القديم على الجديد لا نستفيد من حوارانا الا ضياع الوقت والمجهود ولو كانت القضيتين متشابهه او بينهم ترابط لا تدخل هذا بذاك فصلهم افضل للوصول لنتيجه مرضيه من الحوار ..

* حاول ماتدخل بنقاشات حاده قبل النوم لاننا ندخل كثير بحاله من القهر بعد النقاش الحاد فمن الافضل تنام هادئ نفسيا وبدون توتر عصبي .

* النقاش اللي يحمل اتهامات كثيره ومتعدده لا يعطي بالنهايه اي نتيجه جيده للحوار يعني لما نقول انت فيك وانت قلت مع استخدام اليد بالاشاره نكون شحنا الطرف الاخر للدفاع عن نفسه واعطيناه فرصه يقذفنا بالاتهامات هو بعد اكثر من النقاش معه بالقضيه المعنيه . والمفروض لما ابي اناقش استخدم الاسلوب العاطفي اكثر من اسلوب تبادل الاتهامات حتى اخلق فرصه لتعاطف الطرف الاخر معي وامكانية استجابته وتفهمه .

* الالفاظ مسأله مهمه جدا والادب في التحاور واستخدام الالفاظ المحترمه يفرض عليك نوع من احترام الطرف الاخر ومتابعه الحوار باافضل مما لو كان السب والشتم هو منطلق الحديث

* في الاخير لا تتكلم وهناك شخص لازال يتكلم انتظره حتى ينتهي من كلامه ومن ثم اطلب انت مواصله الحوار اذا كنتوا في جماعه .مقاطعة الشخص عموما تعتبر من سوء الادب وليس فقط من مساوء الحوار ..


اتمنى لكم الفائده جميع وما تكررون اللي صارير بين نجلاء وسعيدان وحصه ..